İyülniñ 7-nde tintüvlerden soñ tutulğanlardan biri, Rusiye quvetçileri Rusiyede yasaqlanğan «Hizb ut-Tahrir» teşkilâtınıñ bölüginde iştirak etkeninde qabaatlağan qırımlı Seyran Hayretdinov bu qabaatnı red ete ve sebepsiz dep saya. Bu aqta tutulğannıñ advokatı Lilâ Gemeci Qırım.Aqiqat Radiosınıñ yayınında ayttı.
«Tahqiqat malümatına köre, Aleksandr Sizikov – soqur insan – terror gruppasını qurıp, iştirakçilerine plan ve vazifeler berdi. Olarnıñ fikirince, birinci derece körme saqatı kitap oquy – olarnı, ebet, gizliden qoyğanlar. Seyran Hayretdinov ve Alim Sufyanov gruppağa kire eken – soñkisi ise diger eki kişini tanımay. Müvekkilim qabaatlı olğanını red ete ve qabaatını tanımay», – dep qayd etti advokat.
Lilâ Gemeciniñ fikirince, tutulmalarınıñ asıl sebebi tutulğanlarnıñ vatandaş fikirlerinen bağlıdır, çünki Qırımnıñ Rusiye akimiyeti olarnı begenmey.
«Seyran – ev insanı, pek faal degil, qorantasınen çoq vaqıt keçire edi, amma onı da almağa kelgenler. Bugünde-bugün Rusiyeniñ terror ile küreş qanunları repressiyalar, farqlı fikirlerni bastıruv içün alet olaraq qullanılğanınıñ bir delilidir, terror ücümleriniñ ögüni aluv degil. Bu saçmalıqta yaşaymız», – dedi Gemeci.
Rusiye FSBsiniñ malümatına köre, «Qırım sakinleri arasında terror mefküresini yayğan, qırımlı musulmanlarnı özüne celp etken» «Hizb ut-Tahrir» bölügini qurğanından ve iştirak etkeninden şübheli sayılğanlar tutuldı. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatı, terror faaliyeti vaqtında qullanğan elektron malümat taşıyıcıları» alındı.
Tintüvler iyülniñ 7-nde saba erte yedi qırımlınıñ evinde keçirildi: Qurman rayonınıñ Büyük Onlar qasabasında yaşağan Emil Ziyadinov, Aqmescit rayonınıñ Kurtsı qasabasında yaşağan İsmet İbragimov, Bağçasaray rayonınıñ Jeleznodorojnoye köyünde yaşağan Seyran Hayretdinov, Bağçasaray rayonınıñ Sevastyanovka köyünde yaşağan Aleksandr Sizikov, Aqmescit rayonınıñ Bavurçı (Kamenka) qasabasında yaşağan Vadim Bektemirov ve Aluştada yaşağan Dilâver Memetovnıñevinde. Memetov tintüv vaqtında evde yoq edi, onı qıdırmağa devam eteler.
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
