İlhaq etilgen Qırımda özüni izolâtsiya etüv rejimini kazaklar, drujinacılar ve deputatlar nezaret etecek. Bunı mayısnıñ 5-inde koronavirusqa qarşı ştabnıñ oturışında bildirdiler.
"Kazaklıqnıñ sayısını er şeer içün 150 adamğace çoqlaştırdıq/ Keriç, Kefe, Yalta, Aluşta, Kezlev ve Aqmescit şeerlerinde mobil gruppalarnıñ sayısını arttırmağa isteymiz", - dedi rusiyeli Qırım ükümetiniñ başı Yuriy Gotsanük.
Bundan ğayrı rusiyeli Qırım başı Sergey Aksönov, patrul yapmaqqa "deputatlarnı, partiya azalarını ve göñüllilerni" celp etmek kerek dep ayttı.
"Protokolnı tize bilecek Rosgvardiya ya da iç işler organlarınıñ hadimi ve oña yardım etken eki adam olsun dep. Patrulciler az olğanını körsek, konkret bölgede olarnıñ çoqlaştırması aqqında qarar alacaqmız", - dedi Aksönov.
Сидим дома | Крымское фото дня
Hatırtalayıq ki, Qırım Sağlıq Nazirliginiñ malümatına köre, ilhaq etilgen Qırımda 1927 adam koronavirus sebebinden közetile, 854 adam observatorlarda buluna, daa 120 - hastahanelerde.
Qırımda şübeli COVID-19 hastası öldi. Bundan ğayrı onıñ daa bayağı hastalığı bar edi: yürek hastalığı, ekinci tipteki şekerli diabet, üçünci seviyede semirme ve ilâhre.
Qırımda bir çoq müessise ve teşkilâtnıñ faaliyetini toqtatqan ve vatandaşlarnıñ özüni izolâtsiya etmesini belgilegen yüksek seviyeli azırlıq rejimi devam ete. Aqyarda bu rejim mayısnıñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
