Qırımdaki şifahane-kurort saasınıñ müessiseleri iyünniñ 15-nde faaliyetlerini yañıdan başlatacaq. Tek yerli sakinlerni qabul etip olacaqlar. Bu aqta Qırımda yüksek seviyeli azırlıq buyruğınıñ tüzetüvlerinde aytıla.
«İşbu noqta (faaliyet toqtatıluvına dair) 2020 senesi iyünniñ 15-nden itibaren vatandaşlarnıñ vaqtınca qalması içün yer bergende şifahane ve raatlıq evleri, musafirhane faaliyetlerine tesir etmeycek», – dep aytıla Qırımnıñ Rusiye ükümetiniñ saytında derc etilgen vesiqada.
Aynı talaplar şifahaneler içün de bar: olarnıñ faaliyetine iyünniñ 15-nden itibaren izin berile, amma yalıñız Qırım ve Aqyarda qayd olğan vatandaşlar raatlıqqa qabul etile bile.
İyünniñ 15-nden itibaren qırımlılarğa hızmet etecek olğan şifahane-kurort saasınıñ müessise reberleri yañı koronavirus yuqunçı vaqtında iş içün mahsus mecburiyetni imzalamalı. Müşteriniñ COVID-19 diagnozı tasdıqlansa, müessise observatsiya parasını bermege mecbur.
Trenajor salonları ve fitnes merkezleri de Qırımda iyünniñ 15-nde çalışıp başlaycaq. Amma sport salonlarında ancaq ayrı dersler yapılacaq.
Qırım tışından kelgenler içün otel ve musafirhaneler şifahane-kurort ve musafirhane kompleksi obyektleri açıluvınıñ ekinci etapında açılacaq.
Qırımda turistlerni esapqa aluv elektron sistemasını açmağa planlaştıralar.
Bundan evel Aksenov karantin tedbirleri bitkenine qadar Qırımğa kelmemege rica etti. Aprelniñ 29-nda Qırımda evi ve mülki olmağanlar kelse, 14 künge observatorğa alınmalı, dep bildirdi.
Rusiye kontrolindeki Qırım akimiyeti mayısnıñ 24-nden itibaren observatorda qaluv parasınıñ kirsetilüvini «telükesizlik tedbirleriniñ quvetleştirilmesi» dep adlandıra. Bu da regionda kurort mevsiminiñ başlanmasına yardım etecek, deyler.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
