Fevralnıñ 3-nde Rostov-na-Donudaki Cenübiy bölgeniñ arbiy mahkemesi "Hizb ut-Tahrir davası"nıñ mabüsi olğan arap tili mütehassısı İsmet İbragimovnıñ tevqif müddetini yarım yılğa uzattı.
Bunı “Qırım birdemligi” cemaat birleşmesine advokat Ayder Azamatov bildirdi.
Advokatlar diñlevlerde Rusiye nezaretinde olğan Qırım garnizon arbiy mahkemesinden video bağ vastasınen iştirak etkenler.
“Bu mahkeme oturışı mudafaa tarafınıñ muracaatı ile keçirildi, çünki mudafaa tarafı tahqiqat safhasında bir sıra usul bozuvı olğanına inana ve bugün (fevralnıñ 3-nde – QA) mudafaa tarafı davanıñ materiallarında olğan bozuvlarnı kösterdi”, – dep haber etti advokat.
Onıñ sözlerine köre, mudafaa tarafı bir sıra muracaat bergen: köçme mahkeme oturışınıñ keçirilüvi, IV Jeneva şartnamesiniñ qullanuvı, prokurorğa davanıñ qaytarıluvı.
Qabaatlav tarafı ise tek bir muracaatni bildirdi – İsmet İbragimovnıñ tevqif meddetiniñ 6 ayğa, 2021 senesi iyülniñ 24-nece uzatılması aqqında.
“Mahkeme bir saattan ziyade mesleatlaştı. Diger davalarda olğanı kibi aynı qarar çıqardı – mudafaa tarafınıñ bütün muracaatlarını red etmek ve devlet qabaatlayıcısınıñ İsmetniñ tefqif müddetiniñ 6 ayğa uzatılması aqqında muracaatını qanaatlendirmek”, – dedi Azamatov.
Bundan ğayrı mahkeme, İbragmovnı Aqmescitte Rostov-na-Donudaki 1-nci tahqiqat tevqifhanesine etap etmege qarar çıqardı.
Nevbetteki mahkeme oturışı fevralnıñ 10-nda olacaq.
Aqmescitte Rusiye kontrolindeki Qırım Yuqarı mahkemesi istinaf şikâyetini red etip, «Hizb ut-Tahrir davasınıñ» mabüsi olğan arap tili mütehassısı İsmet İbragimovnı2021 senesi martnıñ 2-ne qadar uzattı.
İsmet İbragimov iyülniñ 7-nde Aqmescit rayonınıñ Kurtsı qasabasında tutuldı. O künü daa altı qırımtatarı tutuldı. İbragimov Rusiyede ve işğal etilgen Qırımda yasaqlanğan «Hizb ut-Tahrir» faaliyetini teşkil etkeninde qabaatlana.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
