Cumaertesi künü, mayısnıñ 4-nde, Bağçasarayda Hıdırlez qırımtatar bayramınıñ kontsert programması başlandı, dep bildire Qırımnıñ kütleviy haber vastaları.
«RİA-Krım» neşiriniñ malümatına köre, kün devamında şeerniñ suv anbarı yanında interaktiv ve sergi meydançıqları, milliy yemek pişirüv noqtaları çalışacaq.
Umumen mında medeniyet programmasını taqdim etken Qırım regionlarınıñ 25 noqtası açıldı.
Bayram musafirleri sport yarışlarını, hususan qırımtatar milliy küreşini seyir etecekler.
Kütleviy haber vastalarınıñ malümatına köre, bayramnıñ mahsus musafiri Elbrus Canmirzoyev olacaq, büyük kontsertte ise «Haytarma» qırımtatar yır ve oyun ansambli, «Qırım» folklor ansambli ve Qırım müendislik ve pedagogika universitetiniñ icadiy taqımları çıqışta bulunacaq.
Kreml kontrolindeki Qırım akimiyeti Bağçasarayda qayd etilecek Hıdırlez qırımtatar bayramınıñ musafirleri içün 3 biñden ziyade filcan qave pişirilecek, dep bildirdi.
Hıdırlez – türkiy halqlarnıñ eñ büyük bayramlarından biri. XIX asırda onıñ şeñlikleri üç kün devam ete edi.
Qırımnıñ ilhaqından soñ Qırımtatar Milliy Meclisiniñ vekilleri yarımadada yapılğan Hıdırlez şeñliklerinde iştirak etmekten vazgeçti. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.
