Kreml kontrolindeki Qırım akimiyeti Bağçasarayda qayd etilecek Hıdırlez qırımtatar bayramınıñ musafirleri içün 3 biñden ziyade filcan qave pişirilecek, dep bildire. Bu aqta Qırım akimiyetine yaqın olğan «Krıminform» neşiri bildire.
«Musafirçenlik qaveden başlana. Bu ayrı bir merasim. Qaveden soñ küçüñ arta, keyfiñ de köterile. Qırım musafirçenliginiñ müim bir hususiyeti ola… Er kes sıylanacaq 3-5 biñ qave filcanı olacaq, dep tahmin etemiz», – dep bildire Rusiye Devlet Dumasınıñ işğal etilgen Qırım deputatı Ruslan Balbekniñ aytqanlarını neşir.
Onıñ aytqanına köre, bu sene bayram musafirlerine dünyada eñ büyük cezve taqdim etilecek, onıñ yüksekligi 2,2 metr.
«Onıñ içinde Qave pişirilmeycek, amma cezve bu sene bayramnı yaraştıracaq. Bayramdan soñ cezveni müzeyge berecek olalar», – dep ayttı Rusiye deputatı.
Bağçasarayda mayısnıñ 4-nde Qırımnıñ Rusiye akimiyeti qırımtatarlarnıñ ananeviy bayramı Hıdırlezni keçirmege planlaştıra. Programmada – icadiy taqımlarnıñ çıqışları, milliy küreş yarışları, dekorativ-ameliy sanat ustazlarınıñ sergisi, qırımtatar yemekleriniñ pişirilüvi, bala oyun alanları.
Hıdırlez – türkiy halqlarnıñ eñ büyük bayramlarından biri. XIX asırda onıñ şeñlikleri üç kün devam ete edi.
Qırımnıñ ilhaqından soñ Qırımtatar Milliy Meclisiniñ vekilleri yarımadada yapılğan Hıdırlez şeñliklerinde iştirak etmekten vazgeçti. Ondan ğayrı olar, Rusiye tarafından ilhaq etilgen Qırımda bulunğan yurtdaşlarını da böyle şeñliklerde iştirak etmekten vazgeçmege davet ettiler.
