Qırımda "gaz borusında diversiya yapqanından" şübheli sayılıp apiske alınğan Aziz Ahtemovnıñ tevqif müddeti 2021 senesi yanvarnıñ 23-nece uzatıldı. Bunı Qırım.Aqiqatqa advokat Safiye Şabanova haber etti.
Qararnı Rusiyeniñ nezaretinde olğan Aqmescit Kiyev rayon mahkemesiniñ qadısı Yevgeniy Pronin çıqardı.
"Mahkeme oturışınıñ başında mahkemeniñ devlet sırı ile bağlı olğan iç bir vesiqanı baqmaycağına, yalıñız sıñırlama tedbiriniñ uzatılması baqılacağına atfı etip, oturışnıñ açıq şekilde keçirilmesini, diñleyicilerniñ ve matbuatnıñ vekilleri iştirak etip olmasını istep, muracaat ettik. Qadı muracaatımıznı qanaatlendirmedi, çünki qarar endi alınğan edi. Beklegenimiz kibi sıñırlama tedbiri uzatıldı", - dedi advokat.
Tahqiqatçı öz muracaatında Azizi Ahtemov mahkemeden gizlene bile, şaatlarğa tesir ete bile dep iddia etti ve onıñ Ukraina vatandaşlığı olğanını da qayd etti.
Mudafaa tarafı mahkeme qararına istinaf şikâyetine berecek ola.
Evel, Qırımda tevqif etilgen qırımtatar faali ve siyasetçisi Nariman Celâlnıñ tevqif müddeti 2021 senesi yanvarnıñ 23-nece uzatıldı.
Anğara köyündeki «gaz borusında diversiya» davası
Sentâbrniñ 3-4-nde Qırımda Rusiye quvetçileri tintüvler keçirip, beş insannı tuttı. Olar arasında qırımtatar siyasetçisi ve faali Nariman Celâl bar. Eki doğmuş qardaşlar Aziz ve Asan Ahtemovlar eki ayğa apiske alındı, Azizniñ babası Eskender Ahtemov 10 künge apiske alındı. Asan Ahtemovnıñ qardaşı Arsen 15 künge apiske alındı. Kreml kontrolindeki Kiyev rayon mahkemesi qırımtatar siyasetçisi ve faali Nariman Celâlnı eki ayğa – noyabrniñ 4-ne qadar apiske aldı. Nariman Celâl bütün qabaatlavlarnı inkâr ete.
Sentâbrniñ 7-nde TASS Rusiye malümat agentilgi Rusiye FSB-sine atfı etip, Aqmescit civarındaki Anğara (Perevalnoye) köyü yaqınlarında gaz borusında diversiya yapqanından şübheli sayılğanlar qabaatını itiraf etkenler, dep bildirdi. FSB yayınlağan videoda eki ekrek kimden talimat alğanlarını ve Anğara köyünde gaz borusınıñ patlatılmasını nasıl teşkil etkenlerini tafsilâtlı aytıp berdi.
FSB, diversiyanı Ukraina Mudafaa nazirliginiñ Baş istihbarat idaresi teşkil etti, dep israr ete.
Ukraina Mudafaa nazirliginiñ baş istihbarat idaresi Rusiye FSBsiniñ qabaatlavını «bir maqsadı olğan provokatsiya» olaraq köre.
Ukraina akimiyeti qırımtatar faalleriniñ tutuluvı ve apiske alınuvını avgustnıñ 23-nde Kyivde keçirilgen «Qırım platformasınıñ» sammitinen bağlay.
Ukraina ombudsmanı Lüdmila Denisova Qırımda insanlarnıñ apiske alınması sebebinden BM İnsan aqları Yuqarı komissarı Michelle Bacheletke muracaat etti.
Sentâbrniñ 3-4-nde Qırımdaki faallerniñ evlerinde keçirilgen tintüvler ve tutuvlardan soñ Qırım Muhtar Cumhuriyeti ve Aqyar prokuraturası cinaiy tahqiqat başlattı.
