Sentâbrniñ 13-nde saba Rusiye uquq qoruyıcıları tarafından evinde tintüv yapılğan «Qırım birdemligi» cemaat birleşmesiniñ faali Osman Belâlov bağğa çıqtı. Bunı Qırım.Aqiqat mühbiri haber ete.
Belâlovnıñ ğayıp olmasınen bağlı tafsilâtlı bir malümat yoq. Faqat, tuvğanlarınıñ aytqanlarına köre, sağlığı yerinde.
Tintüv vaqtında Osman Belâlov evde yoq edi. O, Aqmescitke yol alğan edi, amma anda öyle de baralmadı. Faalniñ tuvğanları qayda olğanını bilmegenlerini bildirdiler.
Tintüvden soñ Belâlovlarnıñ babası tutulıp alınğan edi, soñra ise çıqarılıp yiberildi.
Ukraina tış işler nazirligi «Qırım birdemligi» faaliniñ evinde ötkerilgen tintüvni takbih etti.
2016 senesi Qırımnıñ rus mahkemesi Osman Belâlovqa 10 biñ ruble para cezasını tayin etken edi. O, 2016 senesi mayısnıñ 12-nde Bağçasaraydaki «Salaçıq» kafesi yanında «ruhsetsiz mitingte» iştirak etüvde qabaatlanğan edi. O künü faaller Rusiye telükesizlik hadimleri qırımtatarlarda tintüv yapqanını eşitip, kafe yanında toplaşqan ediler.
