Qırımda daa eki COVID-19 hastası qayd etildi. Bu aqta aprelniñ 15-nde Qırım ve Aqyardaki Rospotrebnadzor idaresiniñ yolbaşçısı Natalya Penkovskaya yañı koronavirus yuqunçınıñ tarqaluvına qarşı meseleler operativ ştabınıñ toplaşuvında ayttı.
Hastalardan biri – martnıñ 25-nden aprelniñ 6-na qadar Moskvada tedaviylengen qırımlıdır.
«Sarğılav yapmaq içün Aqşeyh hastahanesine barğanına baqmadan, alâqada olğan insanlar pek az. Daa soñra Kezlev şeer hastahanesine alındı. Uçaqta alâqada olğan insanlar belli ve tibbiy közetüv altına alındı. Yaqından alâqada olğanlar – qorantası – observatorğa alındı. Tibbiy yardım köstergen dört tibbiyet hadimi de tibbiy közetüv altında buluna», – dep ayttı Penkovskaya.
Onıñ bildirgenine köre, ekinci hasta Yaltada qayd etildi. Penkovskayanıñ qayd etkenine köre, bugün Yalta hasta sayısına köre lider ola.
«Bu Moskva sakinleri, qoranta azalarınıñ bir qısmı martnıñ 19-nda Yaltağa keldi, martnıñ 24-nde daa bir qoranta azası keldi. 11-nde hastanıñ ilk alâmetleri oldı. Yalta yuqunç hastahanesine keldi ve hastahanege alındı», – dedi Penkovskaya.
Rospotrebnadzor vekili qayd etkenine köre, bu qoranta azaları ve olarnıñ alâqaları ile problem bar.
«Qorantağa observatorğa alınacaqlarına dair qarar berildi. Olar istemediler. Şimdi Yalta şeer mahkemesi içün malümat azırlanıla, observatorğa mecburen alınacaqlar, altı kişi observatsiyağa alınmalı», – dep qoştı müessise yolbaşçısı.
Aqyarda aprelniñ 15-nde saba COVID-19 diagnozı tasdıqlanğan dört kişi yuqunç hastahanesinde yata, 1312 insan tibbiy közetüv altında qala.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
