Aqyarda aprelniñ 15-nde saba COVID-19 diagnozı tasdıqlanğan dört kişi yuqunç hastahanesinde yata, 1312 insan tibbiy közetüv altında qala, dep bildire Aqyarnıñ Rusiye ükümeti.
«Yılnıñ başından berli Aqyarda sekiz hasta qayd etildi, dört kişi tüzelip hastahaneden çıqarıldı. Bugünki künde 64 insan yuqunç hastahanesinde közetüv altında buluna. 1248 kişi yaşağan yerinde közetile», – dep aytıla haberde.
Aqyarnıñ Rusiye akimiyeti, observator olaraq çalışqan «İzumrud» pansionatına Daşa Sevastopolskaya hastahanesiniñ hastaları ve hadimleri, dördünci şeer hastahanesiniñ tibbiyet hadimleri ketirildi, dep bildirdi.
Aprelniñ 14-nde Aqyarda sekizinci koronavirus hastası qayd etildi. Aprelniñ 14-nde saba 606 insan koronavirus sebebinden ekimlerniñ közetüvi altında bulundı.
Aqyarda vatandaşlar özüni izolâtsiya etüv rejimini bozğanları içün 24 protokol tizildi. Rusiye mahkemesi memuriy davalardan biriniñ qararını bu afta çıqarmağa niyetlene.
Qırımda özüni izolâtsiya etüv rejimi aprelniñ 30-na qadar, Aqyarda ise aprelniñ 19-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
