Pandemiya başlağanından Qırımda eñ çoq yañı koronavirus hastası sentâbr ayında qayd etildi. Bu aqta Qırım ve Aqyardaki Rospotrebnadşçor idaresiniñ yolbaşçısı Natalya Penkovskaya COVID-19 tarqaluvı ile küreş operativ ştabınıñ toplaşuvında bildirdi.
«Bu vaqıt devamında 3972 insan hastalandı. Umumiy sayıdan 39%-ı sentâbrde olğanlar, yani sentâbrde eñ çoq hasta oldı. Qırımda hasta sayısı 2,1 olaraq artmağa devam ete, bu bayağı yüksek», – dep ayttı Penkovskaya.
Bundan evel Qırımda koronavirus hastalarınıñ sayısı arta, dep haber etildi.
Keçken künü Qırımda 83 koronavirus hastası qayd etildi. Umumen Qırımda 3972 yañı koronavirus hastası qayd etildi, 2526 insan tüzeldi. 54 hasta vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
