Rusiye nezaretindeki Aqşeyh rayon mahkemesi, 5 yaşındaki ögey balasınıñ öldürüvinde qabaatlanğan aqaynıñ - Aleksandr Pilipenkonıñ tevqif müddetini uzattı. "RİA Novosti Krım" matbuatı yazğanı kibi, aqaynıñ apis müddetini bir ayğa - 2020 senesi fevral 12-sine qadar uzattılar.
Daa evel bildirilgeni kibi, 2019 senesi noyabrniñ 12-nde 2013 senesi noyabrniñ 28-nde doğğan Darya Pilipenko Aqşeyh rayonınıñ Toq Şeyh (Kropotkino) köyündeki evinden belli olmağan yerge ketip, qaytmadı. Balanıñ ğayıp olğanı aqqında noyabr 13-ünde ögey babası haber etti. Qızçıqnıñ qıdıruvına göñülliler ve dronlar da qoşuldı.
Noyabr 15-inde Qırım ve Aqyar boyunca Rusiye tahqiqat komitetiniñ idaresi, beş yaşındaki qızçıqnı ölü tapqanlarını haber etti.
Şeklengen adam balanı öldürgenini itiraf etti. Öldürüvniñ sebepleri belli degil.
