Oktâbrniñ 19-ı sabasına Qırımda daa eki koronavirus hastası vefat etti. Böylece, COVID-19-dan vefat etkenlerniñ sayısı 112 oldı. Bu aqta Qırımnıñ Rusiye Sağlıq nazirliginiñ matbuat hızmeti bildirdi.
«Qırım Cumhuriyetindeki yañı koronavirus vaziyeti boyunca er künlik monitoring malümatına köre, 3003 insan tibbiy közetüv altında qala, 1210 insan evde dinamik közetüv altında buluna, 1674 kişi hastahanede yata, 119 insan observatorlarğa alındı», – dep aytıla haberde.
Hatırlatamız, Rusiye kontrolindeki Qırım yolbaşçısı Sergey Aksenov yarımadada keçken künü 161 yañı koronavirus hastası qayd etildi, dep bildirdi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
