Rusiye kontrolindeki işğal etilgen Qırım yolbaşçısı Sergey Aksenovnıñ bildirgenine köre, yarımadada keçken künü 161 yañı koronavirus hastası qayd etildi. Bu aqta o, Facebook saifesinde yazdı.
«Oktâbrniñ 18-nde Qırım Cumhuriyetinde 161 koronavirus hastası qayd etildi. 95-i tibbiy yardım içün muracaat etkende qayd etildi, 65-i daa evel qayd etilgen hastalarnen alâqada oldı, 1-i (esas – QA) Ukrainadan keldi», – dep qayd etti Aksenov.
Qırımda oktâbrniñ 18-nde saba 169 koronavirus hastası qayd etildi, 4 hasta vefat etti. Akimiyetniñ malümatına köre, bugünge qadar 7009 hasta qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
