İlhaq etilgen Qırımda koronavirus ile hasta dört adam ağır alda reanimatsiyada yata. Bunı mayıs 19-ında Rusiye nezaretindeki Qırım sağlıq naziriniñ müavini Anton Lâsovskiy COVID-19 ştabınıñ oturışında aytıp berdi.
"1013 adam evlerinde dinamik nezaret altındadır, hastahanelerde ise 258 adam yata. Observatorlarda 692 adam buluna. COVID-19 tedaviylemesi içün açılğan hastahanelerniñ bölüklerinde 178 adam buluna, olarnıñ dörtü reanimatsiyada ağır alda yata", - dedi Lâsovskiy.
Onıñ aytqanına köre, "ağır" hastalardan üçü 7-nci Aqmescit hastahanesindeler, daa birisi - Kezlev hastahanesinde.
Rusiye kontrolindeki Qırım yolbaşçısı Sergey Aksenov bildiregenine köre, işğal etilgen Qırımda keçken künü 4 yañı koronavirus hastası qayd etildi.
Böylece, Qırımda 298 koronavirus hastası qayd etildi. 25-i çetelden, 31-i qomşu Rusiye regionlarından keldi, 9 adam vefat etti. Aqyarda - 139 COVID-19 adisesi qayd etildi, eki adam öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
