İşğal etilgen Qırımda keçken künü 4 yañı koronavirus hastası qayd etildi, dep bildirdi Rusiye kontrolindeki Qırım yolbaşçısı Sergey Aksenov Facebook saifesinde.
Aksönov, bu "yahşı haber" dep ayttı. "Bir künde dört hasta. Amma biñden ziyade test yapıldı. Yahşı bir dinamikadır", - dedi o.
Qırım ve Aqyar boyunca Rospotrebnadzor idaresi başınıñ müavini Dmitriy Krutikov qayd etkeni kibi, bir hasta - Aqmescit hastahanesiniñ işçisi, o koronavirus hastalarınıñ tedaviylemesinen oğraşa edi. Ekinci adise - qomşu Rusiyeniñ Krasnodar şeerinden kelgen Yalta sakini, üçüncisi - Aqşeyh rayonından acele yardım aydavcısı, dörtüncisi - Ukraina qıtasından qaytıp kelgen Yedi Quyu rayonınıñ sakini.
Böylece, Qırımda 298 koronavirus hastası qayd etildi. 25-i çetelden, 31-i qomşu Rusiye regionlarından keldi, 9 adam vefat etti. Aqyarda - 139 COVID-19 adisesi qayd etildi, eki adam öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
