Qırımda faal Sergey Akimov maşnasına cekke qarşı plakat yapaştırğanı içün "Rusiye ordusını itibardan tüşürüv" ile qabaatladılar. Rusiyeniñ nezaretinde olğan Aqmescitniñ merkeziy rayon mahkemesi oña 35 biñ ruble para cezasını berdi.
Martnıñ 30-nda aqşam Akimovğa eki kerek Rusiye quvetçileri keldi.
– Cinayetçiler qıdıruv bölüginiñ az qala reis muavini keldi. Men olarğa dedim: "Sinayetçiler qıdıruv bölügi, başqa işiñiz yoqmı?" Olarnıñ cevabı: "Signal aldıq, meseleni er taraflama yahşı etip baqacaqmız", – aytıp bere Akimov. – Ekinci kere tahqiqatçınen maska taqıp keldiler. Ekstremizm ile küreş merkeziniñ hadimleri protokl tizdiler.
Ekincisi üzerinde Akimov yalıñız bir söz "Cenk" yazıp, onı sızıp taşladı
Akimovnıñ sözlerine köre, oña diqqatnıñ artmasına sebep Volgasına yapıştırğan A3 formatlı eki tabq kâğıtı olğan. Olardan biri artıq yarım yıldır asılı edi. Üzerinde "Qırım memurları ya da Qırımnıñ meselelerini çeziñiz, ya da odalarnı boşatıñız" yazılğan edi. Ekincisi üzerinde Akimov yalıñız bir söz "Cenk" yazıp, onı sızıp taşladı. Bu tabaq kâğıtını yapıştırıp, eki künden soñ quvetçilerniñ diqqatını çekti.
–Men deyim: "Bu nasıl oldı?". Olar deyler, menim qomşularımdan biri ariza yazğan.
Akimov qomşu aqqında ikâge inanmay.
Oña qarşı tizilgen protokolda, "Ukrayinanıñ silâdan arıtıluvı ve denatsifikatsiyası çerçivesinde Rusiye Fedartsiyasınıñ ve vatandaşlarınıñ menfaatlarını qorumaq, halqara tınçlıqnı ve telükesizlikni temin etmek içün RF Silâlı Quvetleriniñ qullanuvını itibardan tüşürüvge yönetilgen açıq areketler" etkeni aqqında yazıla.
– Bugün cenk sözü nege esaslanıp yasaq etilgen? Ne içün Z ve V arifleri ile maşna aydamaq mümkün? Nazirler Şurası, diger qurulışlar, atta acele yardım ve polis maşları olarnen tolu, avtobuslar aqqında daa bir şey demeyim. Ne içün bu mümkündir, amma luğatta olğan adiy söz yasaq?
Akimov Rusiye quvetçileri tarafından taqip etilgen endi birinci kere degil. Onıñ sözlerine köre, o, cemaat faaliyeti içün artıq üç kere umumen 60 biñ ruble para cezasına mahküm etilgen. Amma iç bir cöremeni ödemegen.
–Rusiyege bir kapik bile ödemege istemeyim. Özümni qabaatlı saymayım, - dedi o.
Qırım.Aqiqatqa bu cöyeremeni de ödemeycegini bildirdi. Mahkeme qararını Rusiyeniñ nezaretinde olğan Qırımnıñ Yuqarı mahkemesinde temyiz etecek ola.
Martnıñ 4-nde Rusiye prezidenti Vladimir Putin, Rusiye ordusınıñ Ukrayinadaki areketleri aqqında "yalanlar" içün memuriy ve cezaiy mesüliyet aqqında qanunnı imzaladı.
Martnıñ 24-nde saba Rusiyeniñ nezaretinde olğan Qurman rayon mahkemesi tintüv vaqtında yaqalanğan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi. Smedlâ 2022 senesi martnıñ 9-nda Facebook içtimaiy ağında paylaşqanlarınen «Rusiye ordusını itibardan tüşürgeninde» qabaatlandı. O künü saifesinde böyle bir paylaşuv da oldı: «Dünyanıñ genotsidni olmaycaq operatsiyalardan ayırması içün daa ne qadar barışıqsever sakin, qadın ve yañı doğğan bala can bermeli?»
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kıyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
