«Qırım birdemligi» cemaat jurnalisti, Grani.ru neşiriniñ mühbiri Seyran Menseitov Rusiye prokuraturasından «ekstremist faaliyeti qabul etilmeycegine» dair mektüpni poçta vastasınen aldı. Bu aqta o, «Qırım birdemligi» faallerine tarif etti.
«Kezlevde yaşayım. 2020 senesi mayısnıñ 3-nde «Dünya – zorbalıq ve işğalge qarşı. Menlik yürüşi» «Rusiyege qarşı aktsiyasında» iştirak etmemem içün mektüp yolladılar. 2020 senesi aprelniñ 29-ı tarihi tura», – dep tarif etti Menseitov.
Onıñ qayd etkenine köre, bir afta evelsi oña Rusiye prokuraturasından telefon ettiler.
«Prokuraturadan olğanını aytıp, meni bu tedbirler aqqında tenbilemege mecburlar, dedi. Kelmemni istedi. Red ettim, çünki vaqtım yoq, özleri kelsinler dedim. O da kelmege razı olmadı. Neytral bir yerde körüşmege teklif etti. Körüşmege razı olmadım», – dep bildirdi jurnalist.
Berilgen malümatqa köre, neticede Rusiye prokuraturasınıñ vekili kelip, tenbi vesiqasını oqudı ve onı imzalamağa rica etti.
«Men imzalamadım ve daa evel bir mitingde iştirak etmegenimni ve bunı faallerge basqı dep sayğanımnı dedim. Onı odasında şaatlarnıñ ögünde imzalaycam dep qorquzıp ketti. Meni anda ya FSB, ya militsiya ketirecek eken. Bir afta keçti ve bu mektüp maña poçtanen keldi», – dep izaatladı faal.
Menseitovnıñ fikirince, qırımtatar faallerine, «Qırım birdemligi» faallerine kene basqı yapıla.
Daa evel advokat Edem Semedlâyev qırımtatar faallerine Rusiye uquq qoruyıcıları tarafından «ekstremist faaliyeti qabul etilmeycegine» dair berilgen tenbi vesiqaları basqı ve qorquzuv aletleri ola, dep bildirdi. Bu fikirni o, Qırım.Aqiqat Radiosınıñ yayınında bildirdi.
Daa evel Rusiye politsiyası Han sarayını qorçalağan qadın faalge tenbi vesiqasını berdi.
Bunıñ kibi tenbi vesiqaları diger qırımtatarlarğa da berildi. Olarnıñ arasında qırımtatar milliy areketiniñ faalleri, aq qorçalayıcılar ve «Qırım birdemliginiñ» jurnalistleri bar.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola. Aktsiya mayısnıñ 3-nde kemirilecek edi.
Çubarov, «Qırım yürüşi» arfesinde Kreml qırımtatarlarnı qorquzmağa tırışacaq, dep inkâr etmey.
Martnıñ 31-nde berilgen malümatqa köre, koronavirus sebebinden aktsiya başqa vaqıtqa qaldırıldı.
Mayısnıñ 3-nde Meclis reisi iştirakçileri memuriy sıñırnı keçip, işğal etilgen Qırımğa kirmesini belgilegen «Dünya – zorbalıq ve işğalge qarşı. Menlik yürüşi» aktsiyası olacaq, dep işandırdı.
Rusiye Tış işler nazirligi Qırımtatar Milliy Meclisi ilân etken «Qırım yürüşini» «provokatsiya» dep adlandırdı.
