Keçirilüvi mayısnıñ 3-ne planlaştırılğan «Qırım yürüşi» COVID-19 pandemiyası sebebinden belli olmağan vaqıtqa qaldırıldı. Bu aqta Qırımtatar Milliy Meclisi Refat Çubarov Facebookta bildirdi.
«Dünya – zorbalıq ve işğalge qarşı. Menlik yürüşi» halqara zorbalıqsız aktsiyasınıñ yañı künü Ukrainadaki epidemiologik vaziyetine köre belgilenecek», – dep bildirdi Çubarov.
Onıñ aytqanına köre, aktsiyanıñ ştabı uzaqtan bağda olıp, lokal körüşüvler keçire ve aktsiyağa azırlanmağa devam ete.
Meclis reisi Çubarovnıñ qayd etkenine köre, «Qırım yürüşiniñ» keçirilüvine Qırımda Rusiye tahqiqatçıları oña qarşı açqan dava degil, tek koronavirus tesir ete bile.
2019 senesi dekabrniñ 6-nda Qırımtatar Milliy Meclisiniñ reisi Refat Çubarov «Dünya – zorbalıq ve işğalge qarşı. Menlik yürüşi» halqara zorbalıqsız barışıq aktsiyası azırlana ve keçirilecek, dep ilân etti. Aktsiya vaqtında faller memuriy sıñırdan keçip, Qırımğa kirecek ola.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
