Qırımda aprelniñ 10-unda yarımadada birinci olğan çaqmamazlıq cinaiy davasınıñ ilk mahkeme oturışı keçecek. Qırım advokatı Emil Kurbedinov haber etkeni kibi, oturış saat 9:30-da Kreml nezaretindeki Aqmescit şeeriniñ Kiyev rayon mahkemesinde olacaq.
“Bu dava boyunca qabaatlanğan Osman qabaatını tanımay. O, qadınınıñ ağası Süriyede Rusiyege qarşı cenk etkenini bilip, onı FSB-ge çaqmağanı içün qabaatlana. Rusiye CK-niñ 205.6 maddesi - bir yıllıq apis cezasına qadar. Bu deneme bu maddeniñ ileride qullanılmasına büyük tesir eter. Tahqiqatnen işbirlik yapmadıñmı - mına saña “çaqmamazlıq” maddesi!”, - yazdı Kurbedinov Facebookta.
Kecken yılnıñ noyabr ayında işğal etilgen Qırımda çaqmağanğa qarşı birinci dava açılğan edi.
Berilgen malümatqa köre, 2016 senesi mayısta bir qırımtatarınıñ evinde tintüvler keçirildi, tehnikası alınğan edi. Menfaatlarını temsil etken advokatlar adını aydınlatmay. Tahqiqatnıñ malümatına köre, bu insan ömür arqadaşınıñ qardaşı Suriyede bulunğanını bilip, bunı uquq qoruyıcı organlarına bildirmedi ve onıñnen bağ tutmağa devam etti.
Qırımda bu adise «Yarovaya qanunı» çerçivesinde qabul etilgen deñişmelerden soñ ilk olacaqtır. Çaqmama maddesine köre 100 biñ rublege qadar para cezasını almaq ya da eki yılğa qadar azatlıqtan marum qalmaq mümkün.
