Qırımda keçken künü doquz hasta koronavirus yuqunçından vefat etti. Bu aqta Qırımnıñ Rusiye sağlıq nazirligi bildire.
Er künlik monitoring malümatına köre, 3877 insan (COVID-19) ambulator tedaviylevde, 2259 kişi (COVID-19 ve pnevmoniya) hastahanelerde buluna, observatorlarğa alınğanlar yoq, dep qayd etti müessise.
Pandemiya başlağanından, akimiyetniñ malümatına köre, 32 034 COVID-19 hastası qayd etildi, 946 insan vefat etti. Tüzelgen 26 245 kişi yiberildi.
Rospotrebnadzor, Qırımda koronavirus yuqunçından vefat sayısı yüksek qala, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
