Qırımda koronavirus yuqunçından vefat etkenlerniñ sayısı yüksek qala, dep qayd ete Rospotrebnadzor.
«Nefes yuqunçı, pnevmoniya ve koronavirus hastalarınıñ sayısı soñki afta eksilse de, koronavirustan vefat etkenlerniñ sayısı eksilmey. Vefat etkenler arasında 65 yaş altında olğanlar bar. Ne yazıq ki, bu deñişmey», – dep tarif etti Qırım ve Aqyardaki Rospotrebnadzor idaresiniñ yolbaşçısı Natalya Penkovskaya COVID-19 ile küreş operativ ştabınıñ toplaşuvında.
Onıñ malümatına köre, umumen Qırımda koronavirus hastalarınıñ sayısı keçken aftağa baqqanda 22% eksildi.
«Hastalar arasında – 46% – çalışqan eali. Mında kene eñ çoq hasta – tibbiyet hadimleri, tasil hadimleri ve vazifedarlar», – dep qoştı Penkovskaya.
Qırımda keçken künü 181 koronavirus hastası qayd etildi. Qırımnıñ Rusiye sağlıq nazirligi bildirgenine köre, pandemiya vaqtında 720 hasta vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
