Tünevin Qırımda daa yedi yañı koronavirus adisesi tasdıqlandı, bunı rusiyeli Qırım başı Sergey Aksönov bildirdi.
"Adiselerniñ episi epidemiologiya tetqiqatı ve laboratoriya skriningi neticelerinden belli oldı. Hastalar hastahanege qoyuldı, alâqa daireleri belgilendi", - denile beyanatta.
Daa evel Aqmescitte koronavirus hastası vefat etkeni bildirildi.
Akimiyetniñ malümatına köre, şimdilik Qırımda 638 yañı koronavirus adisesi qayd etildi. Olardan 36-sı çetelden, 94-ü qomşu Rusiyeden ketirildi, 480 adise tibbiy yardımğa muracaat etilgende ve 28-i - laboratoriya skriningi yapılğanda belli oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
