Keçken künü Qırımda 306 koronavirus hastası qayd etildi, 9-ınıñ hastalıq alâmetleri yoq, dep bildirdi Qırımnıñ Rusiye yolbaşçısı Sergey Aksenov.
Bu, Qırımda pandemiya vaqtında bir künde qayd etilgen eñ büyük koronavirus sayısı oldı.
«227 hasta tibbiy yardım içün muracaat etkende qayd etildi, 79 kişi daa evel qayd etilgen hastalarnen alâqada oldı. Bir künde tüzelgenlerniñ sayısı 197 insan oldı, umumen bütün müddet devamında 14 110 kişi tüzeldi», – dep aytıla Aksenovnıñ içtimaiy ağlardaki haberinde.
Rospotrebnadzor, dekabr ayında avgust ayına köre koronavirus hastalarınıñ sayısı 13 qat arttı, dep bildirdi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
