Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, avgust ayına köre yarımadada koronavirus hastalarınıñ sayısı 13 qat arttı.
«Soñki üç afta vaziyet biraz stabilleşti, dep aytqan edik. Dekabrniñ ortasında hasta sayısı artacağını tahmin etken edik ve bütün tahminlerimiz doğru çıqa. Amma, avgust ayına köre, kurort regionlarında (hasta sayısında – QA) artış olğanda, hasta sayısı 13 qat arttı. Em de çalışqan yaşlarda – 12 qat», – dep ayttı Penkovskaya dekabrniñ 9-nda COVID-19 ile küreş operativ ştabınıñ toplaşuvında.
Onıñ malümatına köre, soñki üç aftada hasta sayısı umumen 1,7 qat arttı. Hastalıq qapıluv yerleri – naqliyat, tükân, büyük tükânlar, yerleşüv yerleri (ötel, musafirhaneler).
Qırımnıñ Rusiye yolbaşçısı Sergey Aksenov, yarımadada koronavirus yuqunçınıñ tarqaluv vaziyeti fenalaşa, dep qayd etti.
Keçken künü Qırımda 278 koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
