Qırımda keçken künü 178 yañı koronavirus hastası qayd etildi, Bu aqta Qırımnıñ Rusiye başı Sergey Aksönov haber etti.
Onıñ bildrgenine köre, hasta olğanlarnıñ umumiy sayısından 106 adam tibbiy yardım içün muracaat etkende qayd etigen, 72 daa evel qayd etilgen hastalarnen alâqada olğan
Tünevin 3080 adam baqındı. Bütün vaqıt devamında 26499 adam tedaviylendi.
Hatırlatamız ki, Qırımda keçken künü 173 yañı koronavirus hastası qayd etildi.
Rospotrebnadzor, Qırımda koronavirus yuqunçından vefat sayısı yüksek qala, dep qayd ete.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
