Qırımda qayd etilgen 10 yañı COVID-19 hastası aqqında haber etildi. Bu aqta yarımadanıñ Rospotrebnadzor idaresi bildirdi.
«Bütün hastalar yuqunç hastahanelerine alındı. Qayd etilgen yañı koronavirus hastalarınıñ 50%-ı (5 hasta) alâmetsiz edi», – dep aytıla haberde.
Böylece, Qırımda 385 yañı koronavirus hastası qayd etildi.
Mayısnıñ 29-nda Qırımda altı yañı koronavirus hastası qayd etildi.
Mayısnıñ 29-nda Aqyarda yañı COVID-19 hastaları qayd etilmedi, dep bildire şeerniñ Rusiye ükümetiniñ matbuat hızmeti.
Umumen Aqyarda 161 insan koronavirusnen hastalandı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
