İşğal etilgen Qırımda keçken künü koronavirus diagnozı tasdıqlanğan üç kişi vefat etti. Bu aqta mayısnıñ 18-nde koronavirus ile küreş operativ ştabınıñ toplaşuvında Rusiye kontrolindeki Qırım baş nazir muavini Yelena Romanovskaya bildirdi.
«(Mayısnıñ 18-i – QA) sabasına dört hasta ağır alda buluna. Üçü oksigen ala ve bir hasta invaziv olmağan aqcigerlerni suniy avalandıruv cihazına bağlı. Ne yazıq ki, keçken künü üç hastamız vefat etti, umumen doquz koronavirus hastası vefat etti. 39 senesi ve 45 senesi doğğan qadınlar ve artıq qorquzğan bir şey – 68 senesi doğğan hasta», – dep tarif etti Romanovskaya.
Onıñ qayd etkenine köre, vefat etkenlerniñ «bir sıra hronik hastalığı bar edi», eki taraflı pnevmoniya oldı, koronavirus yuqunçı ise «hastalıqnı ağarlıştırdı».
«155 hastamız orta ağır alda hastahanede buluna ve eki hastanıñ alı bir qarar. 1919 insan tibbiy közetüv altında buluna, 997-si evde ve 244 insan hastahanede buluna. 678 observatorğa alındı, 21 boş yer bar», – dep qoştı Yelena Romanovskaya.
Hatırlatamız, mayısnıñ 17-nde Romanovskaya Qırımda ağır alda olğan sekiz kişi aqqında bildirdi.
Rusiye akimiyetiniñ bildirgenine köre, mayısnıñ 16-nda Aqyarda üç yañı COVID-19 hastası qayd etildi. Böylece, şeerde koronavirus hastalarınıñ sayısı 138-ge arttı. 75 kişi tüzeldi, eki insan vefat etti.
Mayısnıñ 18-i sabasına işğal etilgen Qırımda keçken künü 13 yañı koronavirus hastası qayd etildi. Böylece, Qırımda 294 koronavirus hastası qayd etildi. 24-ü çetelden, 30-ı qomşu Rusiye regionlarından keldi, 27 hasta Rusiyeden kelgenlernen alâqada olğan edi, 211 hasta laboratoriyada tasdıqlanğan hastalarnen alâqada oldı, 2 kişi sağlam insannıñ tedqiqi neticesinde qayd etildi. 104 insan tüzeldi.
Mayısnıñ 18-nden itibaren Qırımda özüni izolâtsiya etüv rejimi lâğu etile, amma maska taquv rejimi qala.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
