Qırımnıñ Rusiye ükümeti portalında Kreml kontrolindeki Qırım yolbaşçısı Sergey Aksenovnıñ buyruğı derc etildi. Oña binaen, mayısnıñ 18-nde koronavirus pandemiyası sebebinden kirsetilgen özüni izolâtsiya etüv rejimi çalışıp başlay.
Vesiqağa köre, evde qalmaq talabını «ihtiyac olmağanda yaşağan yerini terk etmemek» ibaresine deñiştirildi. Hususan turizm maqsadlı yolculıqlarnı da sıñırlamağa tevsiye etile.
65 yaştan büyük qırımlılar kene de evde qalmalı, çağına yetmegenler ana-babasız cemaat yerlerinde bulunamaz.
Bazarertesi kününden başlap çetelden ve qomşu Rusiyeden kelgen insanlar izolâtsiya rejimine riayet etmeli.
Qayd etilgenine köre, Qırımda maska taquv rejimi qala.
Keçken künü Qırımda 13 yañı koronavirus hastası qayd etildi. Böylece, Qırımda 272 koronavirus hastası qayd etildi. 24-ü çetelden keldi, 26-sı Rusiyeden keldi. Eki kişi vefat etti. Akimiyetniñ malümatına köre, daa eki hastanıñ ölüm sebebi belli degil, amma COVID-19 diagnozı qoyulğan edi. Aqyarda 135 kişi koronavirus yuqunçına oğradı, 65 insan tüzeldi, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
