Qırımda hastahaneden tış pnevmoniya hastalarınıñ sayısı arta. Qırımnıñ Rusiye sağlıq naziri Aleksandr Ostapenkonıñ bildirgenine köre, soñki aftada 564 insan hastahanege alındı.
«Hasta sayısı bayağı arttı. Soñki aftada 564 hasta hastahanege alındı… 440-ınıñ ağır ve pek ağır hastahaneden tış pnevmoniyası bar», – dep ayttı Ostapenko koronavirus yuqunçınıñ tarqaluvı ile küreş operativ ştabınıñ toplaşuvında.
Keçken künü Qırımda 118 koronavirus hastası qayd etildi, dört hasta vefat etti. Umumen Qırımda, yerli akimiyetniñ malümatına köre, 5288 koronavirus hastası qayd etildi, 3246 insan tüzeldi, 76 hasta koronavirustan vefat etti. Yılnıñ başından Aqyarda 1191 insan hastalandı, 753 kişi tüzeldi, 33 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
