Link açıqlığı

Saatnıñ esas haberi

Qırımda daa dört hasta koronavirustan vefat etti – akimiyet


Keçken künü Qırımda 4 hasta koronavirustan vefat etti.

Bu aqta oktâbrniñ 7-nde saba Qırımnıñ Rusiye sağlıq nazirligi derc etken malümatında aytıla. Böylece, Qırımda bu yuqunçtan vefat etkenlerniñ sayısı 76 oldı. Bu hastalar aqqında tafsilâtlı malümat berilmey.

«2504 insan tibbiy közetüv altında buluna, 751 kişi evde dinamik közetüv altında qala, 1606 kişi hastahanede, 147 insan observatorlarğa alındı», – dep aytıla Sağlıq nazirliginiñ haberinde.

Keçken künü Qırımda 118 koronavirus hastası qayd etildi. Qırımda, yerli akimiyetniñ malümatına köre, 5288 koronavirus hastası qayd etildi, 3246 insan tüzeldi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG