Qırımda beş insan COVID-19 diagnozınen ağır alda reanimatsiyada buluna. Bu aqta mayısnıñ 12-nde Qırımnıñ Rusiye baş nazir muavini Yelena Romanovskaya koronavirus ile küreş operativ ştabınıñ toplaşuvında bildirdi.
«Beş kişi ağır alda reanimatsiyada buluna, pek ağır alda, 100 kişi orta ağır alda, qalğanları bir qarar. Qayd etemiz ki, orta yaşlarda hastalarnıñ sayısı arta: 33 insan – 18 yaşından 39 yaşına qadar ve 56 kişi – 40 yaşından 64 yaşına qadar», – dep qayd etti Romanovskaya.
Onıñ malümatına köre, 1700 insan tibbiy közetüv altında buluna, olardan 893 kişi evde qala, 189 insan hastahanede, 618 kişi observatorda buluna.
Böylece, al-azırda Qırımda 209 koronavirus hastası qayd etildi, 24-ü çetelden keldi, 21-i – Rusiyeden. 64 kişi tüzelip yahşı oldı. Eki insan vefat etti. Aqyarda 126 COVID-19 hastası qayd etildi, eki kişi vefat etti.
Qırımnıñ Rusiye akimiyeti bildirgenine köre, mayısnıñ 12-nden itibaren mecburiy qoruv maskalarını taquv rejimi kirsetile, Qırımda özüni izolâtsiya etüv rejimi mayısnıñ 31-ne qadar uzatıldı, Aqyarda – mayısnıñ 17-ne qadar.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
