İşğal etilgen Qırımda mayısnıñ 12-nden itibaren koronavirus yuqunçına oğrav telükesi sebebinden mecburiy maska rejimini kirsetmege teklif eteler. Bu aqta Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bu yuqunç ile küreş operativ ştabınıñ toplaşuvında bildirdi.
«Sıñırlav tedbirleri biraz yımşatılğanına köre yarımadada maska rejimini kirsetmege teklif etem», – dep ayttı Penkovskaya.
Rusiye kontrolindeki Qırım yolbaşçısı Sergey Aksenov oña qol tuttı.
Onıñ qayd etkenine köre, naqliyatta, cemaat müessiselerinde maska taqıluvı mecburiy olacaq.
Penkovskayanıñ tarif etkenine köre, mecburiy maska rejimi vaziyetinde qorçalav vastası tibbiy olmamalı.
«Maskasız insan ticaret yerine, naqliyatqa kirip olamaz. Maska taquv rejimi budır. Tibbiy maska olmamalı. Belli vaqıttan soñra deñiştirilecek adiy maska olmalı», – dep qayd etti Penkovskaya.
Bundan evel mecburiy maska rejimi Aqyarda kirsetildi.
Qırımda keçken künü altı koronavirus hastası qayd etildi.
Böylece, al-azırda Qırımda 111 koronavirus hastası bar, 21-i çetelden keldi, 13-ü – Rusiyeden, 77-si yerli ola. Aqyarda 89 COVID-19 hastası bar, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
