Qırımda keçken künü altı koronavirus hastası bar. Bu aqta Rusiye kontrolindeki Qırım yolbaşçısı Sergey Aksenov COVID-19 ile küreş operativ ştabınıñ toplaşuvında bildirdi.
«Üç kişi – Saq rayonındaki kilse horınıñ iştirakçileri, bu hastalarnen alâqada olğan Saq hastahanesiniñ emşiresi. Bir kişi Aqmescit rayonınıñ sakini, bu qoranta Moskvadan ameliyattan qayttı ve pnevmoniya oldı. Bir kişi – Krasnoperekop rayonı, Tuzla (Poçetnoye) köyü. İsteseñiz, öldüriñiz, amma qayda hastalanğanını añlamaymız», – dedi Aksenov.
Onıñ aytqanına köre, Qırımda hastalığı alâmetsiz keçkenler bar.
«Olar bir-birine yuqturalar. Bir şeerde qaynay. Bu belli olmağance vaziyetni körmeymiz. Bu alâmetsiz hastalarnı qayd etmesek, vaziyetni toqtatıp olamamız», – dep qayd etti Aksenov.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ aytqanına köre, Saq rayonında 15 kişiniñ yarısında koronavirus yuqunçı tasdıqlandı, olar pasha ibadethanelerinde de iştirak etti.
Onıñ qayd etkenine köre, alâmetsiz hastalarnıñ koronavirus yuqunçı çoqusı allarda onuncı künde qayd etile.
Böylece, al-azırda Qırımda 111 koronavirus hastası bar, 21-i çetelden keldi, 13-ü – Rusiyeden, 77-si yerli ola. Aqyarda 89 COVID-19 hastası bar, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
