İşğal etilgen Qırımda koronavirus diagnozı tasdıqlanğan beş insan vefat etti. Bu aqta Qırımnıñ Rusiye sağlıq nazirliginiñ matbuat hızmeti bildire.
«Er künlik monitoring malümatına köre, Qırım Cumhuriyetindeki yañı koronavirus yuqunçı vaziyetine köre, 2344 insan ambulator tedaviylevde (covid), 2506 insan hastahanede (covid ve pnevmoniya) buluna, 16 kişi observatorlarğa alındı. Qırım ve Aqyardaki Rospotrebnadzor idaresi umumen 13375 COVID-19 hastasını qayd etti. 9318 insan tüzelgen soñ yiberildi», – dep aytıla haberde.
Hatırlatamız, Rusiye kontrolindeki Qırım yolbaşçısı Sergey Aksenovnıñ bildirgenine köre, Qırımda keçken künü 225 yañı koronavirus hastası qayd etildi.
Rospotrebnadzor, yarımadada COVID-19 hastalarınıñ sayısı dekabrniñ ortasında pek artacaq dep bekleyler, dep qayd etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
