Qırımda koronavirus yuqunçı tarqalğanına baqmadan, azıq bazarları qapatılmaycaq, yarmalıqlar ise ileride de keçirilecek. Bu aqta Qırımnıñ Rusiye yolbaşçısı Sergey Aksenov bildirdi.
Onıñ aytqanına köre, bazar ve yarmalıqlar fiyat siyasetini tertiplemek içün semereli bir alet ola, aynı vaqıtta, yarmalıq tedbirleriniñ keçirilüvinen bağlı ilâve tedbirler kirsetilmeli: ticaret çadırlarını telükesiz mesafege qoymaq içün normativ mesafeni yazmaq kerek.
Aksenovnıñ qayd etkenine köre, ticaret ve hızmet müessiseleri içün ticaret obyektleri yanında vatandaşlarnıñ toplanmaması boyunca tevsiyeler berildi, vatandaşlarğa ise sırada bir-birinden eñ az eki metr mesafede turmağa tevsiye etile.
«Bundan ğayrı, azıq olmağan ilk ihtiyac mallarınıñ cedveli tüzetilecek, anda ev ve köy hocalıq ayvanları içün yem kirsetilecek, karantin vaqtına veterinar aphaneleri qapatılmaycaq. Qırımda qurucılıq obyektleri içün qum ve köşeli çaqıl işlep çıqarğan müessiseler de sıñırlav cedvelinden çıqarılacaq», – dep yazdı Aksenov Facebook saifesinde.
Onıñ bildirgenine köre, karantin vaqtına qapatılacaq obyektler sırasına lombard, kredit kassaları, mikrokredit teşkilâtlarnıñ ofisleri, içki satqan tükânlar, insanlar özleri maşinalarnı yuvğan yerlerden («Moy sam») ğayrı, bütün maşina yuvucıları kirsetildi.
Hatırlatamız, cumaertesi künü, martnıñ 28-nde, Yaltada yarmalıq yapıldı ve ziyaretçileriniñ çoqusı koronavirus boyunca risk gruppasından edi.
Qırımnıñ Rusiye yolbaşçısı Sergey Aksenovnıñ bildirgenine köre, martnıñ 29-ı sabasına qadar Qırımda yañı koronavirus hastaları qayd etilmedi. Qırımda koronavirus yuqunçı sebebinden 2620 insan tibbiy közetüv altında buluna, olardan 2548-i evde dinamik tibbiy közetüv altında qala.
Hatırlatamız, 2020 senesi martnıñ 28-ne qadar Qırım yarımadasında 20 koronavirus hastası qayd etildi: 15 – Qırımda ve 5 – Aqyarda.
Qırım ve Aqyardaki Rospotrebnadzor idaresiniñ yolbaşçısı Natalya Penkovskayanıñ bildirgenine köre, Qırımda martnıñ 27-nde saba yedi yañı koronavirus hastası qayd etildi. Böylece hastalanğanlarnıñ sayısı 14 oldı.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
