2019 senesi ilhaq etilgen Qırımda tintüv ve basqınçlarnen başlandı. “Millet” rusiye televizion kanalında “Krımskiy konsensus” tok-şousında “Qırım” qırımtatar halqınıñ cemaat areketi”niñ prezidium reisiniñ muavini Teyfuk Gafarov, qırımtatar faallerine qarşı küç qullana bilecek bir topluluq bar olğanını bildirdi.
“Buña diqqat etkenler az, amma Qırımda başqa bir topluluq, başqa munasebet şekillene. Men bilem, çünki bizim cemaat teşkilâtımızğa yigitler kele edi. Olar deyler: toqtañız, bu daa ne qadar süreycek - adamlar çıqa, deñizcilerge qol tutqanını ayta, daa bir şeyler, keliñiz biz şu eriflerni meydandan alıp taşlayıq, biz bunı begenmeymiz, biz buña qol tutmaymız. Bu - iş adamları, sportçular ve ilâhre. Menimce, bir kün ola, olarnı kimse tutıp olamaz ve şimdilik çeşit-türlü vaqia ve tedbirlerde kösteriş yapqan şu, ceplerinde grin-karta olğanlarnı, bir kunü memuriy binalardan quvarlar. Bunen de er şey biter”, - dedi rusiye tarafdarı olğan cemaatçı.
Onıñ aytqanına köre, bu yıl “meraqlı” vaqialar yüz berecek.
“Bu yıl pek meraqlı olacaq, men bellesem, bunı közetmek zevqlı olur. Men yaqında, Qırımda qac türlü leyha ve cemaat teşkilâtını yaratmağa ıntıluv olğanını talil ettim: til mevzusı, krematoriy mevzusı, daa başqa mevzularnen halqnı “sezip baqmağa”, qıbırdatmağa tırıştılar. Kene de, mında bizde nasıldır keyfler yaratmağa ıntılğan şu cebindeki grin-kartanen erifler”, - ikâye etti Gafarov.
Aynı zaman, o, onıñce, bu yılı “Qırım” cemaat areketinde olğanrusiye tarafdarı qırımtatarlar, serbest qırımtatar faalcilerne qarşı sert çareler körecek dep qayd etti.
“Qırım” areketiniñ başlığı deñişti. Bayagı gençler ve iş adamları qoşuldı, olar deyler - bezdik, ne içün Facebooknı açqanda, biz anda arbiylerge destek köstere ekenmiz, biz daa bir şeyler yapa ekenmiz, daa nasıldır vaziyetler. Kerginlik quvetleşe ve cemaat endi dayanalmay. Men sizge aytayım, bu yıl biz çoq deñişmelerni körecemiz, yani Qırımda keyflerni yaratmağa tırışqanlarğa, Aqmescitte nasıldır destek bar olğanını köstergenlerge, işte, olarğa başqa böyle imkânlar berilmez. Menimce, şu gençler, Ukrainda yapmağa sevgenleri kibi, zelönkanen işaretlemege çıqar, bellesem, sert çareler körülecek ve bunen er şey biter”, - dedi “Qırım”nıñ bas muavini.
Qırımtatar Milliy meclis reisi muavini İlmi Ümerov, Teyfuk Gafarov müim olmağan meselelerni qasevet ete dep belley.
“Birinciden,bütün yayın (ve bu ilk sefer degil) Ukrainağa bağıslanğanı közge çarpına. Ne, “rusiyeli” Qırımnıñ çezilecek meseleleri qalmadımı? Ya da qırımtatar halqınıñ nasıldır aqları yerine ketirildimi? Ya da körgezmeli qorqutuv repressiyaları, basqınç toqtatıldımı? Ya da, Teyfuk Gafarovnıñ özü öz vaqtında saylavdan keçip, azası olmağa tırışqan, qırımtatar milliy meclisiniñ yasaqlanması toqtatıldımı? Ya da bala ve torunlarımız ana tilinde tasil alamı? Ya da tamir sıfatında Qırım hanlarınıñ yekâne saqlanılıp qalğan sarayınıñözgünligi yol etilmeymi? Bu cedvelni devam etmek ve etmek mümkün…”, - Qırım.Aqiqatqa tefsir olaraq dedi Ümerov.
Onıñ fikrince, Gafarovnıñ sözleri - açıq qorquzuv.
“Ukraina deñizcilerine destek köstergen faalcilerge qarşı çıqacaq “iş adamları” ve “sportçular” aqqında laflar - bu açıq qorquzuvdır. Böyle “mesele çezüvler”ni teyfuk ve eyvazlarnıñ ellerinen, “iş adamları” ve “sportçular”nen (adet üzre böyle “tituşka” ve aydutlarğa deyler) isbirlikte FSB yapacaq. Bir (eñ azından) böyle vaqia endi yüzberdi. Men Qarasuvbazarda Riza Asanovğa basqınnı közde tutam. Demek ki, bu ilk sefer degil ve tesaddüfen yapılğan şey degil olğanını bilmek kerekmiz. “Bu yıl bu yapılacaq”, - işğal akimiyetiniñ borazanı olğan Teyfuk Gafarov dedi. Şükür ki, qırımtatarlarnıñ çoqusında, ‘Qırım konsensusı” iştirakçileri kibi eriflerge qarşı immunitet bar’’, - dedi Meclis reisi muavini.
Faalci Zair Smedlâ, Qırımda cemaatçılarğa qarşıbasqınçlarnıñ yañı seviyesi başlandı dep tüşüne.
Körünip tura ki, basqınçlarnıñ, faalcilerniñ ömrüne suiqastlarnıñ yañı seviyesi başlandı, başı da endi ilân etildiZair Smedlâ
“Körünip tura ki, basqınçlarnıñ, faalcilerniñ ömrüne suiqastlarnıñ yañı seviyesi başlandı, başı da endi ilân etildi.Felânça sportçular akimiyetke keder etken faalcilerni meydandan alıcağı aqqında televizionda kollaborantlardan birisiniñ bildirüvi - begenilmegen faalcilerniñ yoldan alınacağı içün bir ilândir, işte, bu yıl o endi tekrarlandı. Böylece, yanvar 2-sinde ukrain deñizcilerge yardım etkenlerden birisi Riza Asanovnı köteklediler, yanvar 14-ünde ise bilinmegen adamlar, Qırımtatar Qurultayı azası Nazim Memetovğa attılar”, - dedi Qırım.Aqiqatqa tefsir berip faalci.
O emin ki, faallerniñ ücümi, bunı yapqan adamlarğa istenilgen neticelerni - adamlarnıqorquzmaq - köstermez.
