İşğal etilgen Qırımda martnıñ 11-nde Bağçasarayda keçirilgen kütleviy tintüvlerden soñ Rusiye quvetçileri tarafından tutulğan cemaat jurnalisti Amet Suleymanov qabaatlandı.
Bu aqta advokat Lilâ Gemeci «Qırım birdemligine» haber etti.
«Tahqiqat, müvekkilim Amet Suleymanovnı qabaatladı. Qabaatlı olaraq celp etilgenine dair qararnı elde ettik, tahqiqatçı müvekkilimniñ yazı örneklerini de aldı. Tintüv vaqtında ev tışında tahqiqatçılar, operativ hadimler, tahqiqatçılarnıñ versiyasına köre, cinaiy davanen bağlı metin olğan kâğıtnı tapqan eken», – dep tarif etti Gemeci.
Advokatnıñ qayd etkenine köre, müvekkili tintüv vaqtında oña kitaplar gizliden qoyuldı, kâğıtnen iç bir alâqası yoq, dep bildirgen edi.
«Bugün bunı isbatlamaq içün yazı örneklerini berdik», – dep qayd etti Gemeci.
Onıñ bildirgenine köre, Amet Suleymanov daa bir davanıñ iştirakçisi ola: «Musulmanlar barğan camilerde diniy, islâm mevzularını muzakere etkeni içün mesüliyetke çekile».
Gemeci, Suleymanov ev apsinde buluna ve saqlanmağa niyeti yoq, dep bildirdi.
Daa evel Amet Suleymanov ev apsine alındı. Advokat Lilâ Gemeci bunı Suleymanovnıñ «ciddiy hastalığınen» bağlay.
Qırımlı aq qorçalayıcı Lutfiye Zudiyevanıñ Qırım.Aqiqatqa bildirgenine köre, martnıñ 11-nde Rusiye FSB hadimleriniñ teşebbüsinen qırımtatarlarnıñ evlerinde bir sıra tahqiqat tedbiri başlatıldı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler.
Onıñ malümatına köre, tutulğanlar Rusiye Ceza kodeksirniñ 205.5 maddesine istinaden (Terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
