Qırımdaki mahkeme, «Hizb ut-Tahrir davasınıñ» mabüsi Suleymanovnı ev apsine yolladı (video)

Rusiye kontrolindeki Aqmescitniñ Kiyev rayon mahkemesiniñ qadısı Andrey Dolgopolov martnıñ 12-nde Qırımdaki Rusiye FSBsi tahqiqatçısınıñ muracaatınen Bağçasaraydaki üçünci «Hizb ut-Tahrir davasınıñ» mabüsi Amet Suleymanovnı ev apsine yolladı. Qırımlı aq qorçalayıcı Lutfiye Zudiyevanıñ Qırım.Aqiqatqa bildirgenine köre, martnıñ 11-nde qırımtatarlarnıñ evlerinde Rusiye FSB hadimleriniñ teşebbüsinen bir sıra tahqiqat tedbiri başlandı. Yedi tintüv keçirildi, beş kişi tutuldı: Enver Mustafayev, Seytumer Seytumerov (tarihçı – QA), Osman Seytumerov, Amet Suleymanov, Rustem Seytmemetov. Olarnı FSB bölügine alıp ketkenler. «Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.