Qırım şeerleriniñ arasında alâ daa qanunsız adam taşıması bar, çünki avtobus vokzalları öz işini keregi kibi becerip olamay. Bunı Qırım.Aqiqat Radiosı efirinde Qırım avtomobil tayışıcılarnıñ Birleşmesiniñ prezidenti Nikolay Diskin ikâye etti.
"Avtovokzal, tez ve keyfiyetli bilet satuvını becerip olamay. Kassalarğa nevbet olmasa edi ve er kes serbest ve tez onı ala bilse edi, qanunsız tayışıyıcı endi bu yolcusız qalacaq edi. "Krımavtotrans" iş keyfiyetini yahşıca yapmaq ve bilet almasın tezleştirmek ve qolaylaştırmaq kerek", - dedi ekspert.
Nikolay Diskin, qanunsız tayışıcılarnen küreşmek içün, olarnıñ naqliyatı tutulıp alınsa, bu semereli olur, dep qoştı.
"Evel öyle edi - bir qanun bozuqlıqlarından soñ qanunsız taşıyıcınıñ maşnası tutıp aluv meselesi köterile edi. Amma qanunsız taşıyıcılar er vaqıt bar edi ve olarnıñ işi içün şarait olğance, öyle de olacaqlar", - dep yekünledi Diskin.
Daa evel Qırımnıñ rusiyeli naqliyat naziri Sergey Karpov, "Krımavtotrans" devlet müessisesiniñ yañı müdirni - Rıjkin Yuriy İgoreviçni taqdim etti.
Yañı reber, müdir vazifesini vaqtınca icra etecek. Matbuat hızmeti bildirgeni kibi, nazir, er afta devlet müessiseniñ işi aqqında esabat bermege buyurdı.
Qırım Naqliyat Nazirliginiñ ve "Krımavtotrans" saytlarında yañı tayinlev aqqında şımdilik malümat yoq.
Yuriy Rıjkin 2015 yılından 2019 yılınace "Qırım demir yolu" müessisesinde çalıştı. Soñki vaqıtları - baş müdirniñ muavini olıp.
Daa evel matbuat, quvetçiler "Krımavtotrans" müessisesiniñ ofisinde tintüv yapa, dep bildirgen edi. Amma müessise matbuat hızmeti, "Krımavtotrans" çalışqanı kibi çalışa ve ofisinde iç bir türlü tahqiqat tedbirleri keçirilmey, dep bildirdi.
