Qırımnıñ rusiyeli naqliyat naziri Sergey Karpov, "Krımavtotrans" devlet müessisesiniñ yañı başlığını taqdim etti. Bu hususta, müessiseniñ matbuat hızmetine esaslanıp, "Krıminform" haber resursı bildirdi.
"Krımavtotrans" reberlerinen muşavere keçti, anda yañı müdir Rıjkin Yuriy İgoreviç taqdim etildi. Naqliyat naziri, iç meselelerni çezmege ve areketlerniñ kelişilgenligi temin etmege buyurdı", - dep bildirdi matbuat hızmeti.
Yañı reber, müdir vazifesini vaqtınca icra etecek. Matbuat hızmeti bildirgeni kibi, nazir, er afta devlet müessiseniñ işi aqqında esabat bermege buyurdı.
Qırım Naqliyat Nazirliginiñ ve "Krımavtotrans" saytlarında yañı tayinlev aqqında şımdilik malümat yoq.
Yuriy Rıjkin 2015 yılından 2019 yılınace "Qırım demir yolu" müessisesinde çalıştı. Soñki vaqıtları - baş müdirniñ muavini olıp.
Daa evel matbuat, quvetçiler "Krımavtotrans" müessisesiniñ ofisinde tintüv yapa, dep bildirgen edi. Amma müessise matbuat hızmeti, "Krımavtotrans" çalışqanı kibi çalışa ve ofisinde iç bir türlü tahqiqat tedbirleri keçirilmey, dep bildirdi.
