İlhaq etilgen Qırımda, bayram munasebetinen avgust 12-si, bazarertesi künü qoşma raatlıq künü dep ilân etildi.
Qurban bayram bir qaç kün bayram etile. Rusiye nezaretindeki Qırım ve Aqyar musulmanları diniy idaresi (QAMDİ), Qırım musulmanları Qurban bayramnıñ avgust 11-inden 14-ünece qutlaycağını bildirdiler.
Aqmescitte avgust 11-inde bayram namazını Profsoyuzlar Medeniyeti Evinde keçirdiler.
Avgustnıñ 12-sinde Aqmescitte bayram tedbirleri Trenöv adına parkta keçirilecek.
"Tedbir programmasında - icadiy taqımlarnıñ çıqışları, ustalıq dersleri ve yarmalıq, milliy aşlarnıñ degustatsiyası. Saat 16:30-dan saat 18:99-ğace Trenöv adına parkta kontsert, sergi ve yarmalıq, ustalıq dersleri keçirilecek, bundan ğayrı, küreş olacaq", - dep bildirdi Aqmescit memüriyetiniñ hadimi İslâm Üseinov.
Bayramnıñ resmiy qısmı saat 18:00 başlanacaq - musafirler ögünde QAMDİ müftisi Emirali Ablayev çıqışta bulunacaq. Saat 18:20-den 20:00-ğace qırımtatar taqımları iştiraginen kontsert keçirilecek.
Qurban Bayramı musulmanlarnıñ eñ büyük bayramlarından biri olaraq, Mekkege acılıqnıñ soñuna yetmesini temsil etip, Oraza Bayramından 70 kün keçken soñ İbraim peyğamberniñ qurbanı hatırasına keçirile.
Qurban Bayramı büyük meydanlarda cemaat ile qılınğan saba namazından başlana ve ondan soñ er yerde ayvanlarnı soyıp başlaylar. Bu ananeniñ tamırları, alemlerniñ Rabbisi İbraim peyğamberge oğlu İsmailni qurban etip çalmağa bermeyip ve sonki daqqasında qoynı kesmege buyurıp toqtatqanı aqqında qadimiy bir ikâyege barıp yeteler.
