Aqmescitte bayram namazını Profsoyuzlar Medeniyeti Evinde keçirdiler. Bunı Rusiye nezaretindeki Qırım ve Aqyar musulmanları diniy idaresiniñ (QAMDİ) matbuat hızmeti bildirmekte.
"Qırım müftisi haci Emirali Ablayev, musulmanlarğa hutbenen hitap etti. O, birlik, qardaşlıq ve yardımdaşlıqqa davet etti. Er kün er birimiz, yaqınlarımız içün ne yaptım, nasıl oña yardım ve destek köstedim, dep soramalı. Ve böyle er kün olmalı. Adam qol tutuvnı duymaq kerek", - dep yaza müftiniñ sözlerinden matbuat hızmeti.
Beyanatqa köre, bugün Aqmescitte mahsus ayırılğan meydançıqlarda qurban çalınacaq ve ihtiyacı olğanlarğa etler tarqatılacaq.
QAMDİ, Qırım musulmanları Qurban bayramını avgust 11-inden 14-üne qadar qutlaycağını hatırlattı.
