Aqmeçit (Çernomorskiy) rayon şurasınıñ rusiyeli deputatları yañı şeer başını tayinleycek ola. Qırımnıñ rusiyeli ükümetiniñ saytında bunıñ aqqında Qırım başınıñ buyruğı derc etildi.
Aqmeçit (Çernomorskiy) rayon şurasınıñ başını tayin etmek içün yarış komissiyası teşkil etildi. Bu komissiyağa baş naziriniñ müavini Yuliya Jukova ve ükümetniñ daa üç memuri kirgen.
"Krıminform" haber etkeni kibi, tayinlev fevralniñ 12-sinde yapılacaq.
Rusiye nezaretindeki Aqmeçit (Çernomorskiy) rayonınıñ memuriyet evelki başı Lüdmila Gluşko, dekabrniñ 10-unda yol qazasında elâk oldı.
Lüdmila Gluşkonı rayon memuriyetiniñ başı olaraq 2019 senesi oktâbr 29-ında ğayrıdan tayinlegen ediler. Qırım olhaqından evel o, "Krasnoyarskiy" quş sovhozında çalışa edi. 2016 senesinden başlap, Aqmeçit rayonınıñ başı olaraq çalışa edi.
