Qırım memurları, bir kün evel yol qazasında elâk olğan Aqmeçit rayonınıñ başı Lüdmila Gluşkonen vedalaştı.
Kreml nezaretindeki Qırım başı Sergey Aksönov, o, "mesüliyetli, namuslı, aqiqiy mütehassıs ve vatanperver" olğanını ayttı.
"Lüdmila Nikolayevnanıñ ve bu qaza elâk olğan er kesniñ tuvğanları ve yaqınlarına samimiy taziye bildirem", - dedi Aksönov.
Rusiye nezaretindeki Aqmeçit (Çernomorskiy) rayonınıñ memuriyet başı Lüdmila Gluşko, yol qazasında elâk oldı. Bu, dekabr 10-unda saba belli oldı.
Lüdmila Gluşkonı rayon memuriyetiniñ başı olaraq 2019 senesi oktâbr 29-ında ğayrıdan tayinlegen ediler. Qırım olhaqından evel o, "Krasnoyarskiy" quş sovhozında çalışa edi. 2016 senesinden başlap, Aqmeçit rayonınıñ başı olaraq çalışa edi.
