Qırımlı vatandaş jurnalistleri, hususan Nariman Memedeminov, Remzi Bekirov, Osman Arifmemetov, Rustem Şeyhaliyevniñ apiske alınması qırımtatarlar arasında yañı insanlarnıñ kelmesine sebep ola. Böyle bir fikirni bazarertesi künü, sentâbrniñ 30-nda, qırımlı aq qorçalayıcı, faal Lutfiye Zudiyeva Kyivde matbuat konferentsiyasında bildirdi.
«Olarnıñ yerine başqa insanlar keldi, bu yer boş qalmadı. 24 insan apiske alınğan martnıñ 27-si qırımtatarlarnıñ tarihında eñ büyük tintüvler künü oldı. Bu halq böyle tintüvlerni daa körmegen edi. O künü er bir faal tezden onıñ da qapusı qaqılır, dep tüşüngen edi. Birden 20-den ziyade evden yayın yapmaq pek zor edi. Jurnalistikadan bir şey añlamağan qomşular, siyasiy mabüslerniñ apayları, 15-16 yaşlarında gençler yayın yapmağa başlağanda şaştıq», – dedi Zudiyeva.
Onıñ qayd etkenine köre, Qırımdaki vatandaş jurnalistikası – «pek canlı, er daim yañartılğan bir şey».
«Apiske alınğanlarnıñ (vatandaş jurnalistleri – QA) yerine yañı insanlar kele. Amma bu şaraitlerde inkişaf etmek pek qıyın», – dedi Zudiyeva.
Rusiyeniñ Qırım işğalinden soñ mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» teşkilâtı ile alâqaları bar olğanından şübheli sayılğan qırımlı musulmanlarnıñ evlerinde kütleviy tintüvler sıq-sıq ötkerilip başladı. Rusiye akimiyeti milliy ve diniy sebeplerden taqip olğanını inkâr ete.
