Qırımda martnıñ 27-nde saba Rusiye uquq qoruyıcıları Aqmescit rayonınıñ Mamaq (Strogonovka) köyünde ve Aqmescitniñ Bavurçı (Kamenka) qasabasında yaşağan yigirmiden ziyade qırımtatarınıñ evini tinte.
«Qırım birdemligi» cemaat birleşmesiniñ haber etkenine köre, tahqiqat tedbirleri Remzi Bekirov, Osman Arifmemetov, Rustem Şeyhaliyev, Erfan Osmanov, Aziz Bekirov, Akim Bekirov, Abdulaziz Umerov, Mecit Abdurahmanov, Tofik Abdulgaziyev, Yaşar Muyedinov, Seitveli Seytabdiyev, Edem Yayaçikovnıñ evinde keçirile. Umumen, soñki malümatqa köre, 22 ev tintile.
Faallerniñ bildirgenine köre, Bavurçı qasabasında tintüvler keçirilgen maalleni Rusiye gvardiyası qapattı. Yerli sakinlerni evlerine yibermeyler.
Qırımlı advokat Mammet Mambetov Qırımnıñ Qarasuvbazar rayonındaki Köneçi (Vladimirovka) köyünde tintüv keçirilgenini haber ete.
Keçirilgen tintüvlerniñ sebepleri belli degil. Rusiye uquq qoruyıcıları bunı açıq şekilde izaatlamay.
Qırım.Aqiqat tafsilâtlı malümat almağa tırışa.
Martnıñ 26-nda saba Qırımnıñ memuriy sıñırında Rusiye sıñırcıları «Qırım birdemliginiñ» faalleri Remzi Bekirov ve Ruslan Suleymanovnı tutıp aldı. Bir qaç saat tutıp, olarnı yibergenler. Ekisi de pasportlarnı bozğanında qabaatlandı. Aynı vaqıtta, memuriy bozuv aqqında bir de bir protokol berilmedi.
İşğalden soñ Qırımdaki faktik Rusiye akimiyeti mustaqil jurnalistler, cemaat faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
