Link açıqlığı

Saatnıñ esas haberi

Qırımda apis etilgen Baluhnıñ müddetten evel şartlı azat etilmesinen bağlı mahkeme oturışını avuştırdılar


Volodımır Baluh mahkemede. Arhiv süreti
Volodımır Baluh mahkemede. Arhiv süreti

Qırımda apis etilgen faal Volodımır Baluhnıñ müddetten evel şartlı azat etilmesinen bağlı Rusiye nezaretindeki Keriç şeer mahkemesiniñ oturışını yanvar 25-ine avuştırdılar.

Bu aqta Qırım.Aqiqat muhbiri bildirmekte.

2019 senesi yanvar 9-ında yerli vaqıtnen saat 10:30 Volodımır Baluhnıñ müddetten evel şartlı azat etilmesinen bağlı mahkeme oturışı keçirilecek edi. Oturış 2019 senesi yanvar 25-inde saat 14:00 avuştırıldı.

Baluh advokatınıñ aytqanına köre, oturışnı qanuniy incelikler içün keçirildi.

Dekabr 4-ünde “Qırım uquq qoruyıcı gruppası” Keriç koloniyasında apis etilgen ukrain faalcisi Vladimir Baluhqa destek mektüplerni yazmağa çağırttı.

Bundan evel Kreml nezaretindeki Qırım Yuqarı mahkemesi 5 yılğa mahküm etilgen Vladimir Baluhnıñ ükmüni qısmen yımşatıp, onı 4 yıl ve 11 ay umumiy rejim koloniyasında qalmasına ve 10 biñ ruble (tahminen 4 biñ ğrıvnâ) para cezasını ödemesine üküm etti. Faal eki cinaiy iş boyunca tevqif etildi.

Baluh, 2018 senesi martnıñ 19-ında ilân etken müddetsiz açlıqnı devam etmekte. Mabüsnıñ bir ay iç aş aşamağanından soñ, Qırım arhiyepiskopı Kliment, onı iç olmadan 2 stakan cılap kiseli, 50-70 gramm qara ötmek peksimeti ve ballı çaynı içmege qandırdı, böylece onıñ ölmemege küçü yetecek.

Daa evel Baluhnıñ açlıqnı vaqtınca toqtatmaq qararı aqqında belli olğan edi. Advokat Dmitriy Dinzeniñ aytqanına köre, Baluh 200 kün açlıq tutqan soñ ülser ve pankreatit şübesi bar.

FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.

XS
SM
MD
LG