Qırımda afta soñuna qadar büyük yanğın telükesi ilân etilgen. Bu aqta Rusiye FVN-niñ Qırım idaresi bildirmekte.
Müessisege köre, yanğın telükesi iyün 21-23 Qırım şarqında büyüktir. Bundan sebep qurtarıcılar bir sıra areketlerni yasaqlay: quru ot yanında, ormanda tereklerniñ yanında ateş yaqmaq, manğal qullanmaq, açıq ateşi olğan tertibatnı qullanmaq; ateşni baqılmaz qaldırmaq; sigaret içmek, yanğan sernik ve sigaret tüplerini atmaq; pirotehnik şeylerni qullanmaq.
İyün 18-inde Eski Qırım orman müdirliginiñ Kefe (Feodosiya) qısmında tünevin 750 metr kvadratr mıntaqada yapraq-pıtaqlar yandı.
İyün 14-ünde Eski Qırım orman müdirliginde ormanda yerge tüşken yapraq-pıtaqlar yanıp başlağan edi. Yanğın 1,15 gektarnı qaplap aldı. Ateşni söndürmek içün orman müdirliginiñ hadimleri celp etildi.
