İşğal etilgen Qırımda advokatlar Rusiye nezaretinde olğan mahkeme 12 künge tevqif etken meslekdeşi Edem Semedlâyevge destek bildirdiler.
"Qırım birdemligi" cemaat birleşmesiniñ haber etkenine köre, kapmaniyağa Emil Kurbedinov, Siyar Paniç ve Nazim Şeyhmambetov qoşulğanlar.
"100-ge yaqı advokat Edem Semedlâyevniñ destegine şikâyetni imzaladı. Advokatlar cemiyetiniñ, adamlarnıñ doğru cevap bermesi böyle allarda pek müimdir. Destek ne qadar müim olğanını kendim is ettim", – dep qayd etti advokat.
"Edem Semedlâyev qanunsız zulumğa oğratıldı ve qanun qoruyıcı organlar onıñ zaneaat faaliyeti ile bağlı qanunsız tesir kösterdi", – dedi Siyar Paniç.
"Sanam ve eminim ki, mahkemeniñ memuriy tevqif aqqında qararı, cöreme berilmesi ve polis hadimleriniñ areketleri Edem Semedlâyevniñ mudafaa etken insanlarnıñ aqlarınıñ qorçalanması ile bağlı faaliyetine ve nazar noqtasına tesir etmez. O, insanlarnıñ aq ve qanuniy menfaatlarınıñ mudafaası meselesinde uzlaşıcı olmağanı kibi aynı devam etecek", dedi Nazir Şeyhmambetov.
Noyabrniñ 11-nde Rusiye kontrolindeki Aqmescitniñ Kiyev rayon mahkemesi advokat Edem Semedlâyevni 12 künge apiske aldı ve Ekstremizm ile küreş merkeziniñ hadimlerinden biriniñ ögünde soyunmaqtan red etkeni içün 4 biñ ruble para cezasını berdi.
Cumaertesi künü, oktâbrniñ 25-nde, Aqmescitteki Qırım garnizon arbiy mahkemesiniñ binası ögünde Rusiye quvetçileri Qurmandaki «Hizb ut-Tahrir davasınıñ» mabüslerine qoltutmaq içün toplaşqan 20-den çoq kişini tuttı. Tutulğanlarnı Aqmescitniñ Merkeziy rayon polis bölügine alıp kettiler.
Daa soñra Rusiyeniñ Merkeziy rayon bölügine kelip, saba mahkeme ögünde tutulğan qırımtatarlarğa uquqiy yardım köstermek içün kelgen advokat Edem Semedlâyevge qarşı «poliske boysunmağanı» içün memuriy protokol tizildi.
